Þá er árið 2009 liðið í aldanna skaut og kemur aldrei til baka. Gott ár fyrir suma, verra fyrir aðra. Fyrir þá sem þetta skrifar var nýliðið ár heldur tíðindalítið, einkenndist af mikilli vinnu og hversdagslegu brauðstriti. En ég er þakklát fyrir árið 2009, þakklát fyrir góða heilsu, þakklát fyrir að mega enn um sinn njóta samvista við mitt nánasta fólk.

En hvað boðar nýárs blessuð sól? (...þ.e. annað en áframhaldandi Icesave umræður.) Ég hef lengi átt mér stóra drauma um bókaútgáfu og útskrift úr Háskólanum. Hugsanlega tekst mér að láta þessa tvo drauma rætast á árinu 2010. Núna stendur valið á milli áframhaldandi vinnu á Héraðsskjalasafninu eða þess að taka námið með trompi og ljúka því í vor. Fjárhagslega er fyrrnefndi kosturinn heppilegri, en þegar allt er lagt saman þá standa þessir kostir nokkuð jafnt. Þetta skýrist allt á næstu dögum, en hvað sem ég geri þá ætla ég að reyna að gera það besta úr því :)

Enn einu sinni tekst athyglissjúkum miðaldra karlfauski að sjá landsmönnum fyrir umræðuefni. Já auðvitað er Davíð mættur og nú er hann búinn að ná undir sig Mogganum, þessum fornfræga og fyrrum ágæta fjölmiðli sem naut trausts og virðingar þjóðarinnar. Allt sukkið í kringum ráðningu hans er hreint til háborinnar skammar. Ritstjóri og hópur reyndra blaðamanna mátti gjöra svo vel að taka við reisupassanum í gær til að koma sjálfum kónginum í sæti - og vei þeim sem ekki situr og stendur eins og kónginum með bláu höndina þóknast. Hvernig í ósköpunum ætlar Mogginn að halda stöðu sinni sem trúverðugur fréttamiðill með Davíð í brúnni?  

Botn lágkúrunnar (enn sem komið er) var viðtal Katsljóss við Óskar Magnússon, skósvein Dabba kóngs í gærkvöldi. Pínlegra viðtal hef ég ekki séð, enda vakti það með mér svo mikinn viðbjóð að ég horfði ekki til enda! Þvílíkur sleikjuskapur og aulagangur sem kemst fyrir í einum manni! Ég sé hann fyrir mér, sitjandi við fætur Davíðs, hlustandi á hans heilaga boðskap á meðan hann pússar skóna hans eða sleikir á honum tærnar... það fer að sjálfsögðu eftir því hvort Davíð vill. Og nú ætlar Mogginn að færa okkur fréttir af landsmálunum... eins og Davíð vill!

Í mótmælaskyni ætla ég að færa bloggið mitt af vef Davíðs... nánari upplýsingar síðar.

Sumum sveitarfélögum er stjórnað af græðgi frjálshyggjunnar þó að tími hennar sé liðinn og fátt eftir af hennar blómaskeiði nema sviðin jörð og himinháar skuldir. Eitt þessara sveitarfélaga er Fljótsdalshérað sem að mínu mati og margra fleiri fór offari í því gullæði sem ríkti hér fyrir austan. Það var byggt og skipulagt og byggt meira og skipulagt meira eins og þenslan væri komin til að vera. Skýrslum um væntanlega íbúafjölgun sem ekki þóttu nógu hagstæðar var einfaldlega stungið undir stól. En allt tekur enda, nú er sveitarfélagið í djúpum sk... og þá er byrjað að skera niður hjá því hálaunafólki (lesist sem háð) sem vinnur á leikskólunum. Í mínum huga er starfsfólk á leikskólum hetjur. Þetta er fólkið sem elur upp börnin okkar alla virka daga.

Nú er verið að fækka starfsfólki á leikskólunum, hækka leikskólagjöldin, rukka fyrir aukakorter fyrir og eftir vistunartíma og fella niður álag starfsfólks í matartímum. Það er m.ö.o. verið að hækka gjald og skerða þjónustu. Þó ég sé bara fávís þjóðfræðingur, þá hljómar þetta dálítið öfugsnúið. Minnir jafnvel á maðkaða mjölið sem Danir seldu okkur fyrir okurverð á sínum tíma. Til að kóróna svo vitleysuna hefur sú frétt lekið um bæinn að sjálfur bæjarstjórinn hafi verið svo fórnfús að afþakka launahækkun á sama tíma. Er þetta virkilega réttlát stjórnun???

Hvað um það, ég er ánægð með leikskóla dótturinnar og borga leikskólagjöldin með þokkalega glöðu geði. En í staðinn vil ég að barnið mitt sé öruggt í leikskólanum og fái viðunandi þjónustu við kennslu og leiki í þroskandi umhverfi. Til þess að svo megi vera áfram þarf starfsfólkið að vera ánægt í sínu starfi til að sinna því af heilum hug.

Hve lengi er hægt að seilast í vasa venjulegs launafólks? Af hverju eru þessir (afsakið orðbragðið) andsk. helv. djö. útrásardrengir og bankamenn svona heilagir? Í morgunfréttum útvarps var sagt frá þeirri hugmynd Félagsmálaráðuneytisins að skerða fæðingarorlof og taka aftur upp tekjutengingu örorkubóta. Í stað þess að leita þangað sem peningarnir eru þá á að halda áfram að níðast á smælingjum þjóðfélagsins, öryrkjum og ungu fólki sem "lendir í því" að eignast börn. Á sama tíma er Hannes Smárason að reyna að selja hjáleigu sína í London fyrir einn og hálfan milljarð!!! Hvers vegna gerir ríkið þessa hjáleigu ekki upptæka? Þó ekki fengist nema milljarður fyrir kotið þá væri það þó smávegis í botnlaust skuldafenið sem m.a. umræddur Hannes kom þjóðinni í. En hjáleiga upp á einn og hálfan milljarð vekur óneitanlega upp spurningar um verðmæti sjálfs höfuðbólsins. 

Nóg af ergelsi í bili. Ég er næstum hálfkomin í sumarfrí. Rétt aðeins kíki við á bókasafninu stöku sinnum en sit sem fastast á skjalasafninu. Þetta lúxuslíf hefur gefið mér kost á því að dusta rykið af BA ritgerðinni. Og svei mér þá, ég held að það sé að koma smá mynd á herlegheitin. Efni hennar, fátækraframfærsla á Austurlandi á síðari hluta 19. aldar, á kannski sérstaklega vel við á þessum síðustu og verstu. Hver veit nema við smælingjarnir verðum boðnir upp og metnir til fiska eins og tíðkaðist fyrir rúmri öld? Það stefnir margt í þá áttina nema við verðum sennilega metin í Evrum.

Enn eru stjórnvöld að laumast með gráðugar lúkurnar í götuga vasa almennings, þess almennings sem hefur haldið þjóðinni gangandi um aldaraðir, þess almennings sem stritar myrkranna á milli en getur samt ekki leyft sér að ferðast um á einkaþotum eða slappa af á lúxussnekkjum... eða borða gullkryddað risotto! Nei, þessi almenningur skal sko fá að þrífa skítinn eftir bannsetta gullkálfana sem flestir eru flúnir til útlanda með fulla vasa fjár.

Nú er minni réttlætiskennd stórlega misboðið. Hvers vegna er verið að skattleggja eldsneyti og áfengi? Ég hélt að Steingrímur hefði ætlað að leggja meiri skatt á þá ríku! Er ekki kominn tími til að þeir fari að leggja sitt af mörkum til samfélagsins? Þessi "vökvaskattur" kemur reyndar ekkert sérstaklega við mína léttu pyngju, ég nota bílinn mjög lítið og áfengi enn minna. En engu að síður þá koma þessar hækkanir mest niður á sauðsvörtum almúganum. Og ég sem hélt í einfeldni minni að það væri búið að leggja nóg á okkur almúgann.

Það sem mér finnst þó sárast við þetta er að Steingrímur J stendur á bak við þetta, mitt pólitíska átrúnaðargoð. Svo bregðast krosstré sem önnur tré. Hvað á ég að kjósa næst? Kannski ég fari bara sjálf í framboð... ég er fjandakornið ekkert galnari en þeir sem nú sitja í steinkumbaldanum við Austurvöll.